Vöruhús

Distica rekur tvö vöruhús, í Hörgatúni og í Suðurhrauni, þar sem hýst eru alls um 16 þúsund vörunúmer á hverjum tíma. Starfsmenn eru 50 talsins og skiptast niður á þrjú vinnusvæði innan vöruhúsanna. Vöruhúsið í Hörgatúni er sérhæft vöruhús fyrir lyf og uppfyllir kröfur Evrópusambandsins samkvæmt GDP-reglugerðinni (Good Distribution Practices) og rekstur beggja vöruhúsanna er vottaður samkvæmt ISO 9001 gæðastaðlinum. Í vöruhúsinu Suðurhrauni eru allar aðrar vörur en lyf hýstar. Vöruhúsin eru hornsteinn í dreifingu allra vara fyrir íslenska heilbrigðismarkaðinn.

Vöruhús Distica starfa samkvæmt umhverfisstefnu móðurfélagsins og stöðugt er unnið að því að minnka umhverfisspor starfseminnar með því að vera sífellt að endurskoða vinnuferli til dæmis m.t.t. umbúða, endurvinnslu og flokkunar hráefnis sem notað er við starfsemina.

Distica notar Manhattan Scale vöruhúsakerfið við alla ferla og vinnu í vöruhúsunum og fjárhagskerfið Microsoft Dynamics NAV.

Vörumóttaka

Vörumóttökunni í Hörgatúni berast um 160 sendingar í hverjum mánuði sem flestar koma erlendis frá með skipum en einnig er flutt með flugi. Vörumóttökuferlið fylgir ströngum verklagsreglum allt frá því að varan kemur fyrst inn á gólf í vöruhúsinu og þangað til hún er tilbúin til sölu. Sendingar eru skoðaðar með tilliti til skemmda, hitastigs í flutningi og annarra þátta sem þarf að skoða strax í upphafi.

Í móttökuskoðun eru lyf skoðuð með tilliti til þess að þau uppfylli markaðsleyfi á Íslandi og framleiðslustaðfesting og vottorð um söluhæfni liggi fyrir á þeirri lotu sem um ræðir hverju sinni. Í hverjum mánuði taka starfsmenn vörumóttöku á móti 1.800 vörulínum sem fara í gegnum ofangreint ferli. Vörur sem, af einhverjum ástæðum, uppfylla ekki ströngustu kröfur, eru teknar til hliðar og fara í skoðun. Strangar kröfur eru gerðar til endursendinga lyfja og einungis hluta þeirra er hægt að taka við til endursölu og þá að undangenginni annarri móttökuskoðun.

Átta starfsmenn starfa við vörumóttöku í vöruhúsi Distica í Hörgatúni.

Gæðaeftirlit

Distica starfar í samræmi við leyfi sem Lyfjastofnun gefur út. Annars vegar er um að ræða heildsöluleyfi (GDP) og hins vegar framleiðsluleyfi (GMP).

Gæðastjórnunarkerfi Distica tekur mið af kröfum GDP og GMP og er einnig vottað samkvæmt ISO 9001 staðlinum. Umfang vottaðrar starfsemi Distica er innflutningur, umpökkun, birgðahald og heildsöludreifing á lyfjum, heilsuvörum, neytendavörum og vörum fyrir heilbrigðisþjónustu og rannsóknarstofur.

Markmið Distica með rekstri gæðastjórnunarkerfisins er að fyrirtækið hafi getu til að uppfylla

•  ákvæði laga og reglugerða sem um starfsemina gilda
•  ákvæði gæðatryggingasamninga
•  kröfur GMP og GDP

og geti þannig afgreitt rétta vöru, í réttu magni og í réttu ástandi til viðskiptavina sinna.

Bæði Lyfjastofnun og markaðsleyfishafar lyfja sem Distica þjónustar gera reglulega gæðaúttektir á starfsemi fyrirtækisins. Þessar úttektir eru mikilvægar til að fá mat á frammistöðu fyrirtækisins og ábendingar sem nýtast til að gera umbætur á verkferlum sem lúta að innflutningi, birgðahaldi og heildsöludreifingu og ná þannig að bæta stöðugt frammistöðu félagsins.

Vöruhýsing

Vöruhúsið Hörgatúni

Í vöruhúsi félagsins í Hörgatúni eru hýst bæði lyfseðilsskyld og lausasölulyf fyrir íslenska heilbrigðismarkaðinn. Starfsemin fylgir ströngum ferlum og stöðlum sem gilda um meðhöndlun og dreifingu lyfja hvað varðar umhverfi, húsnæði, öryggi, tækjabúnað, verklag og vinnubrögð. Vöruhúsinu er skipt í þrjú grunnvinnusvæði: vörumóttöku, umpökkun og vöruafgreiðslu auk þess sem veitt er þjónusta í tengslum við rannsóknarlyf. Starfsmenn vöruhússins í Hörgatúni eru 40 í 37 stöðugildum.

Distica þarf að geta tryggt að vörur séu geymdar við rétt skilyrði í vöruhúsinu. Eftirfarandi hýsingarskilyrði þarf Distica að uppfylla í sínum vöruhúsum fyrir vörueigendur: stofuhiti (15–25 °C), kælir (2–8 °C), frystir (-20 °C), ávana- og fíkniefni og rannsóknarlyf.

Vöruhúsið Suðurhrauni

Í vöruhúsi félagsins í Suðurhrauni eru hýstar heilbrigðis- og neytendavörur sem dreift er til viðskiptavina um land allt m.a. til sjúkrahúsa, heilbrigðisstofnana, apóteka, dýralækna og stórmarkaða. Í hverjum mánuði er tekið á móti hátt í 300 sendingum og starfsmenn meðhöndla 3–4.000 vörunúmer. Í sumum tilfellum þarf að endurpakka eða merkja þær einingar sem tekið er á móti og er sú þjónusta veitt í vöruhúsinu. Daglega afgreiðir vöruhúsið 200–300 pantanir til viðskiptavina og alls fara um 170 þúsund pakkningar út úr vöruhúsinu í hverjum mánuði. Starfsfólk vöruhússins sér sömuleiðis um útflutning til birgja og umsýslu vara á leið til viðgerðar ásamt margbreytilegum og hefðbundnari verkum vöruhúsa.

Vöruhúsið í Suðurhrauni er um 2.000 m2 að stærð, með 1.300 brettaplássum, 7–8.000 hilluplássum og hitastig hússins er vaktað allan sólahringinn. Þar er góð aðstaða til að geyma og dreifa kæli- og frystivöru og þar er einnig hægt að geyma eiturefni í þar til gerðum eiturefnaklefa. Vöruhúsið er í nánu sambandi við alla helstu flutningsaðila landsins og þétt flutningsnet Íslandspósts er samofið dreifikerfi Distica. Í Suðurhrauni eru 11 fastráðnir starfsmenn í jafnmörgum stöðugildum.

Við munum með ánægju skoða hvort þjónusta Distica gæti hentað þínu fyrirtæki. Vinsamlegast sendu okkur fyrirspurn á distica@distica.is

Stofuhitavara

Þegar fjallað er um hýsingu á stofuhitavörum þá er verið að tala um vörur sem eru geymdar við 15–25 °C í vöruhúsum Distica. Langflestar vörur og vörunúmer sem Distica hýsir falla undir þetta geymsluskilyrði.

Kælivara

Kælivara er geymd við 2–8 °C í vöruhúsum Distica.
Við flutning til viðskiptavina er kælilyfjum pakkað í sérhannaðar flutningsumbúðir sem tryggja að hitastig haldist innan 2–8 °C í allt að 24 klukkustundir á flutningstímanum.
Mikil áhersla er lögð á rekstraröryggi kælikerfis fyrir kælirými lyfjalagers Distica. Mikilvægustu hlutar kerfanna eru því tvöfaldir og einnig eru kerfin tengd varaafli sem er dísilknúin rafstöð. Einnig er til staðar sjálfstæður varakælibúnaður sem keyrir óháð aðalkælibúnaði.

Hita- og rakastigsvöktun

Hitastigi í vöruhúsum Distica er stýrt og hitastigið er sívaktað. Hitaskráningarbúnaður er tengdur öryggisfyrirtæki Distica sem vaktar boð um hitastigsfrávik allan sólarhringinn og kallar út starfsmenn Distica ef hitastig fer út fyrir skilgreind mörk. 

Rakastig í vöruhúsum Distica er vaktað. Á Íslandi er rakastig að jafnaði frekar lágt og ekki hefur þurft að stýra rakastigi í vöruhúsunum. Hita- og rakanemar eru kvarðaðir reglulega.

Umpökkun

Í umpökkun eru íslenskar leiðbeiningar (fylgiseðlar) settar í eða á lyfjapakkningar sem innihalda einungis erlenda fylgiseðla þegar þær koma til landsins. Umpökkunarferlið er skilgreint sem framleiðsla og þarf því að uppfylla strangar kröfur samkvæmt GMP (Good Manufacturing Practices) reglugerð Evrópusambandsins um framleiðslu og meðhöndlun lyfja. Einungis hluti þeirra lyfjapakkninga sem berst í vöruhúsið þarf að fara í gegnum umpökkunarferlið, en í hverjum mánuði er um 80 þúsund einingum umpakkað af starfsmönnum Distica. Í umpökkun starfa 14 manns.

Vöruhús Hörgatúni
Hörgatún 2, 210 Garðabær

Opið frá 10:00 til 16:00

Skrifstofa
Hörgatúni 2, 210 Garðabær

Opið frá 08:00 til 16:00

Vöruhús Suðurhrauni
Suðurhraun 12a, 210 Garðabær

Opið frá 10:00 til 16:00

Google Map